Home
Nach oben
Geografische Lage
Geschichte
Neue Nachrichten
Anzeigen
Neue Inhalte
HOG
Brauchtum
Bildergalerie
Forum
Gästebuch
Links
Kontakt
Suchen
Disclaimer
Seiteninhalt

 

 

 

Pollerpeitsch



Ou Freitag nou d dritte Klaß

Ich war so 9 bis 10 Jouhr alt, mei Leit sein schun frie morjetz in d Schnitt ufs Feld, ich un mei Schweschtr s Res hun d Houm d ganze Lade gschmiß. Mei Motter hot mich noch kortz g weckt un sat zu mir, im kloune Reindl is d Gießbrei for eich zwa, in d Reer im Ouwe sein noch Krumbiere fun geschtr un for jed s fun eich ach ou Hinglsfligl, seit schee brav un vrgeß net d Stall auszumischte un neies Schtroh einzuschtraue.
Na als erschtes hun ich mol die helft vum Grießbrei geß, un wie's Res kumm is hun mr sei helft nochmol g dalt un wie mr nout ali zwa satt ware, sein mr uf die Gaß gang for schpiele.

Do fahrt grad d Kreiners Henrichvetter mit seinr Evwes vrbei un ruft, Fritzche willscht net reite? , mir fahre Kukuruz heifle do kannscht reite bis mr fertich sein. Ich sein glei mitgfahr un sein g ritt bis alles fertich war. S erscht war des jo wunnerschej un schpedr hots do une an meim Sitzfleisch immer mehr gbrennt. Wie mr fertich ware hot mr d Henrichvettr 4 Lei geb, do hat ich mei Kipparsch glei vergeß.

Ufm houmweg sein ich nout ghupst un gschprung for lauter freid, ich hat jo 4 Lei im Sack, un vun dem rumhupse sein ich widr gschwitzt un do hots do hine wider ganz ferchterlich gbrennt. D Houm hun ich mei Hinnrgschtell am Brunne ins Wasserfaß ghengt, iwr dem gehts Gaßeterche uf un um Heinz Martin sei Motter frot, is bei eich alles in Ordnung Fritzche? Ich war so verschrock, hun mei Hos zu schnell rufgzou, un hat nout die Hos voll Wasser ghat! Ich hun nout Krumbiere un Hinglsfligl im schteije geß weil bei mr alles gwatscht hat.

Am nomittag sein mei Freind alli kumm, un des ware net wenich. Im Houf bei uns war ou Akazinascht mit truckene Blätter g'lee, die hum mr vrriwlt for Tuwak, s Staars Martinche, domol 5 oder 6 Jour, hot uns die Reibhelzr ghoult, for des hots ach Rache derfe. Wie die Blättr un die Reibhelzr alli ware, sein mr uf die Gaß gang for Gatschgei schpiele, un do ware meischtns die Nochbrsmädle ach d bei, 2 vuns Fellrs, 2 vuns Baurs, 2 vuns Hoffmann s Staar Evi uns Tindorf Kathrin, mr ware ou ganze Haufe Kinn un ware so richtich mitte drin im schpiele. Ich hun grad noch gsie wie die Kuh sichs Terche selwr ufgmach hot, do is mr eigfall das d Schtall noch net g mischt ist, wie ou Blitz sein ich dere Kuh nou, un hun se ougbun. For mischte hat ich awer jetzt kou zeit , also schnell ou Korb Schtrou un alles war sauwr iwrgschtraut, dann sein ich glei widr uf die Gaß for schpiele gang.

Ich hun net gsie wie mei Leit houm kumm sein un hun net ghert wie mei Mottr gruf hot. S Hoffmann Kathrin hot mr gsat, dei Motter ruft, du sollsch houmkumme!. Ich sein ach glei gang, in d Gedange war ich awr schun widr ufm rickweg for uf die Gaß. Awr hinnrm Gaßeterche hot sichs Wettr gännert. Mei Vatr hot grad sei Sens g denglt, un frot mich glei ob heit jemand doe bei uns war un was mr heit schpielt hun. Ich hun m glei gsat s war heit niemand do bei uns un ich hun draus mit d anre Kinn Gatschgai un Hupapa gschpielt.

Er sat nou ganz ruhig, do nem mol den alte Backkorb un tu mol alli Tschick do im Houf zammsammle, zähle un in d Korb schmeiße. Fun jetzt ou hots mr hinne ougfangzu popre. Ich hun mr noch gedengt wu nor die viele Tschick herkumme, awr ich hun alles gzählt un m Vatr gbrung. Iwr dem schreit mei Motter im Schtall, ich sein glei zu ihr grennt un wolltr helfe, an den iwrschraute Kuhpladr wu s jetzt bis an die Knechl drin gstann hot, hun ich nimmi gdenkt. Awer sie hot glei nou mr gkrapscht un hot mich a glei ghat, sie hot mr gsat das der  Dreck net fun heit ist, un hot mol richtich drufgdrescht, in meim Ejlend hun ich gsat , Mottr schlat mich net ich geb eich 4 Lei, awr des hot alles nix gnutzt sie war so richtich in Schwung. Endlich hat ich des Glick un war r ausgwischt, un glei ruft mei Vatr, na Fritzche wievl Tschick hoscht gsammelt? Ich hun gsat 29, hun awr net gsie dasr d Schusterrieme schun in d Hand ghat hot, un schun hotr mich iwrm Knie ghat un druf ghaa. Uf mei Kipparsch hat ich schun ganz vrgeß. Nou hotr mr nochmol siwe odr acht Iwrgzou un sat, die erschti ware for des, weil heit niemand doe war, un die letschte weil du nou d driti Klaß noch net bis simmunferzich (47) zäjle kannscht.

Erzählt von Fritz Raff



 

Zurück • Home • Nach oben • Weiter

Home • Geografische Lage • Geschichte • Neue Nachrichten • Anzeigen • Neue Inhalte • HOG • Brauchtum • Bildergalerie • Forum • Gästebuch • Links • Kontakt • Sonstiges • Suchen • Disclaimer • Seiteninhalt

Stand Januar 2010


erfolgreich flirten  

Webspace - Webhosting